تۇساۋكەسەر كەزدەسۋدە جەرلەستەرىمىز تۇركيانىڭ «ەدجزادجيباشيىنا» ەش قارسىلىق كورسەتە المادى. 2015 جانە 2016 جىلدارى وسى ءتۋرنيردى قاتارىنان ەكى رەت ۇتقان ىستامبۇلدىق ۆولەيبولشىلار «التايعا» باس كوتەرتكەن جوق – 3:0 (25:10, 25:11, 25:15). كەلەسى ويىندا برازيليانىڭ «پرايا كلۋبىمەن» كۇش سىناستىق. بۇل جولى دا قارسىلاستار كومانداسى ۇستەمدىك تانىتتى – 3:0 (25:14, 25:16, 25:17). ەندى ەرتەڭ وسكەمەننىڭ ارۋلارى تايلاندتىڭ «سۋپەرىمەن» كەزدەسەدى. تاي ەلىنىڭ وكىلدەرى دە العاشقى ەكى باسەكەدە جەڭىلىس تاپتى.
قازىرگى كەزدە «ۆ» توبىندا 6 ۇپايدى ولجالاعان تۇركيا مەن برازيليانىڭ قىزدارى يىق تىرەسىپ, كوش باسىندا كەلەدى. تايلاند پەن قازاقستاننىڭ ۆولەيبولشىلارىنىڭ قورجىنى بوس. ال «ا» توبىندا تۇركيانىڭ «ۆاكىفبانكىنا» ازىرگە تەڭ كەلەر كوماندا تابىلماي تۇر. ولاردىڭ ەنشىسىندە 6 ۇپاي بار.
عالىم سۇلەيمەن,
«ەگەمەن قازاقستان»
